Jekh molos dzīviņdža rom peski romņasa, te lenge hāra nasis čāve. Jekh dīs vijaujape jake, ki romni gija pu veš te doj zalačja phūrorja, kon pusikļakirdža:

-Dža khēre, pārmār ķirbis, zarāv doj thūd te pi dova auri. Toge tuke ločola čāvoro, kon jāla bahtalu te barvalu.

Dova pheņdža, phūrori našadija, bet romni uhtija khēre te kerdža, si lake phendža phūrori. Eņņa čonenge lake ločija šukār čāvoro. Ne romņaki baht nasis hāra, joj sige zanasvalandija te meija. Meija laku rom ni, ki čāveske sis biš berš. Čāvu nodufiņdža: „So kana me te kērav? Džā an svetus baht te rodav.” Jake jov gija gav gavestir, foros forostir, ne baht jake naštija te lačel. Jauja jov an bāru foros kai dzīviņdža barvalu kraļis, koneske sis dživarnu šukār čaj.Laku dād kamja del la pal rom feņu dasav muršeske, kon džinel uzkērel dasav kēriben sav an svetus ošto nikon nadikhja. Būt murša visprobinde ože pengi baht, ne kraļis sāren umbladža, vaš dova ki nikon naštija te uzkērek dasav kēriben so kraļis ošto nadikhja. Dova pušuņdža , čāvu gija ku kraļis te phenela:

Kamā te lav ti ča romņake! Phen, so čebi te kērav!

Kraļis hoļadija te pheņdža:

Tu bučesa , so tuke čebi te kēres? Tu hai džines, ki mi ča romņake dolela feņu dova, kon vaštuvela te uzkērel dasav kēribe, so nikon an svetus ošto nadikhja. Pal da dilnipe so tu mandir bučjan tu mēresa an stāriben!

Kraļiski sargi čurdine čāves an čemnu stāribe. Feņu jone kerde fardu ūdera, jača gaišu te pusikadžape Matuija, fejengi kraļica. Joj lija te rakirel čāvesa:

Natugintut, tu ošto lesa tut kraļiski časa. Ake tikni kastiņa te kaštoro; tirde auri mandir štār bala te tirde pre pu kastiņa, a pu kaštoro, tirde mandir auri butedīr bala! Čāvu kerdža si Matuija čudža. Kedi jov dova sāru vikerdža, feja pheņdža:

Pārtirde kana da balengi kaštoresa pur da kastiņa!

Čāvu kandija, te kastiņatir line te jān auri giļa, kon kerna an dži tugi, te hota. Kedi Matuija našadija, čāvu pukhardža sargen, čudža mi lidžan les ku kraļis te pheņdža leske:

Šun kana te dikta, so me uzkerdžum. Jov lija te činel, te kraļis jača dilnu hotendir. Jov dija čāveske peski šukār ča romņake, te kana jone sāre dzīvinde an baht te an hota.

 Jake an svetus lačape vijola.

No latviešu valodas tulkojis Ana tolijs Berezovskis.