Svencuno Juris trādija piro drom, a preč leste trādija romani kibitka. An kibitka angīl sis bešto kālo rom; rikirdža ličiki.

Kaj trādes romano čāvo? – svencuno Juris phučela.

Dikhes, daj nadūr kamav te čuvav šatra – rom phenela

Me džav pe Jerosaļimos- rakirel svencuno Juris – te dikhav, sir dživel Dēvel Dād.

Oi, mīro, drogo – otripir i amen, romen, rozphen  Devleske so dasave manuša dživen pro svetos! Dēvel mi phenel - sir amenge te dživas, so te kēras.

Lačes, svencuno Juris phenela! – Me leske sāro rozphenava, a pāle javi zadžava ke tume, i phenava tumenge Devleski lava.

Nā, mīro drogo – rom pokačiņdža  šēresa. Me sam tikne  mānušore i tu amendir zabistresa.

So tu rakires, me nazabistrava

Zabistresa, me rakirav

Čebi iščo te rozphenes so svencono Juriske sis čistoratitko graj, leskīro savāri sis promardo sāro dragocenna barenca, a stremji – saunakune. Rom podikhja pe da kučuno savāri i phenela :

Džines so, drogo , mukh mange jekh stremja! Ke tu mukhesa mange la, i bešindoj pe gresko dumo, tu zripiresa men – romen. Jasnes otripiresa, so javela te sphučes Devlestir, pal dava, sir roma te dživen i so lenge te kēren.

San tu bāro hitrjagos, romano čāvo, svencuno Juris podsajinduj pheņdža.

Dorakirdžampes, mukhava tuke kada stremja. Le, la! Ne zaripir, javava pāle, stremja čebisola te odes pāle.

So tu, drogo, savo rakirben! Sāro javela mištes. Ne nazabistir amendir.

Jake jone rozginepes. Svencono Juris trādija dūredīr. Pe drom popeija gav, kaj phujengi gādže čingirde kēr – srubos. Ne jekh kašt popeijapes po khuso i ande štaņa lačapes džirka. Line gādže šelle i davaj te tirden da kašt de dlenguma. Svencuno Juris podživiņdžapes, podtrādija pašedīr i phučela :

So tume kadaj kēren, mānušaje?

Dikhes, raja nabutka na uhtilel, kamas da kašt te podtirdas dlengedīr, ne jov nisir na poddelpes. Možet tu desa menge savi godi?

Me an tumāro štetos perepiļinavas ada kašt pe pāš, čuvavas de štaņa i džirka zakēravas. Ne točņeje me viphučava Devlestir, pal dava me džav de Jerusaļimo te dikhav Dēvel Dādes.

Viphuč, uvažajemo, pozaboķinpe pal mende na gudžvārende!

Svencuno Juris trādija dūredir i udikhja duj hāņinga, maškir lende doj i pāle gine džūļa karamislenca i vjodrenca. Jekh hāņingatir pāņi phēren, de vāvir virāven.

Džūļa phenena vsadņikoske :

Dūr trādes molodco?

Pe Jerosaļimos, amāre Devles te dikhav.

Oi, drogo, ne sphuč Devlestir, palso pe mende javja dasavi bida! Možet jov pe mende obžaļinipes? Me pšīras jekh hāņingatir ke vāvir i pirirāves pāņing jekhatir ande vāvir.

Ladno sphučava.

Nazabistir miļinko, večnes tuke pophenasape

Tel koncos javja svencono Juris an do Jerusaļimos.

Jov gija te prodikhel Dēvel Dādes i ko jekh rozpheņdža leske čudnoma so jov dikhja da mānušen kon tirdine da kašt dlengedīr.

Dava me džinam, Dēvel pheņdža, me kokoro, začemņakirdžom lengo razumos, – paldava so jone jekh jekhes hohade i diļņakirde a godi de šēro naline.

Zaduminde khēr te čuven i kašta pe žima te zakēren. Me lenge pheņdžom – tirden būt vašti ne da kašt ņigdes tume na dolidžana . Me len kazņiņdžom pale lengīri izkušeņija i pale  lengīro dilnipen. Phen lenge Juri, so me otmukhava lengire grehi, ne dūredīr jone mi otčurden pengīri izkušeņija. Dikhjum i vāvir čudi – svencuno Juris phenela.

Džūļa rāde pāņing jekh hāņingatir an vāvir hāņing.

I dava me džinav. Romņen me kazņiņdžom pal dova, so jone otkerde thūd paņingesa i lidžine pe foros te biknen. Ladno, me lendir lava tele da kazņa , ne phen lenge, jone butedir dava te nakēren

Viphenava sāro sir tu pheņdžan – svencuno Juris phenela , kamja te bešel uže pe greste, ne pīro progija pašil gresko bokos i svencono Juris čuķ na svaļiņdžapes tele grestir. Daj jov otripirdžapes stremja so jov dija romeske.

Čuķ, nazabistirdžom kraļi. Me dijom lav romeske, so sphučava tutir, sir romane mānušenge te dživen de svetos dūredīr.

Romenge tu phen dava, – Dēvel otpheņdža, – Me dživen pal peskīre zakoni. Jekhestir vimangena, vāvirestir vihohavena, tritonestir čorna, bi phučibnaskīro čuvena pengīro čačipen– ne dava lengīro kēriben. Prjames jake i phen.

Svencuno Juris javja pāle dromestir. Zalača džūļen, vipheņdža,sir Dēvel čudža. Džūļa sis hotna, so Dēvel lenge prostiņdža i oblinepes sāro pengo vekos butedīr te na mešinen thūd pāņingesa.

Svencuno Juris javja de gav ke gādže, kon čingirde khēr. Jov rozpheņdža pal dava so Dēvel len prostiņdža , ne čudža  jone te pēren pšīro skempumastir. Gādže sis hotna so lenge bida najavela.

Svencuno Juris gija an drom dūredir. Jov podtrādija ko romengo taboros. Kibitkatir so hirela viuhtle romengi čāvore , golinduj : Svencuno Juris, javja, svencuno Juris javja!

Vigine i phūredira.

Ne, so lačo Dēvel Dād,  čudža menge te phenes? – phučja rom, kon lija saunakuni stremja.

Jov pheņdža te phenav jake : Jekhestir vimangen, vavirestir viphučen, tritonestir čoren i dživen bi sprososkīro!

Sāro javela tumāro!

Parikiras Devles Dādes, so jov romen nabistirdža, so dasavo lačo žaļuma otbičadža !

Pophentot Devleske, romano čāvo, ne i man nabistir! Otde mīri saunakuni stremja, mange čebi te trādav duredir.

So tu rakires, mīro drogo? – Savi stremja? Ame tutir nalijam nisavi stremja, Dēvel dikhela! Te mārel amen grumo, ešļi ame tutir so lijam!Te nadikhen amare čavore mištipen, ki ame tutir so lijam...

Jake saunakuni stremja jača ke roma, pal dova so Dēvel čudža : jekhestir vimangen , vavirestir viphučen, ne tritonestir te čoren bi phučibnaskīro  te zakeden! 

No latviešu valodas tulkojis Anatolijs Berezovskis.